თბილისი, 9 ივნისი – Sputnik. არქივების საერთაშორისო დღე მსოფლიოში 9 ივნისს აღინიშნება. ამ დღეს საქართველოში ღონისძიებების კვირეულით აღნიშნავენ, რომელიც იუსტიციის სამინისტროს ეროვნულ არქივში 14 ივნისის ჩათვლით გაიმართება.
რამდენი ადამიანია ჩამოშორებული სასწავლო პროცესს მსოფლიოში – UNESCO მონაცემებს აქვეყნებს>>
ორგანიზატორები 9 ივნისს უძღვნიან თემას „UNESCO-ს მსოფლიო მეხსიერების რეესტრი. საქართველოს ეროვნულ არქივში დაცული ხელნაწერები“. არქივის სამეცნიერო განყოფილების ხელმძღვანელი ქეთევან ასათიანი ისაუბრებს ეროვნული არქივის პუბლიკაციებსა და ქართულ ხელნაწერებზე, რომლებიც UNESCO-ს მსოფლიო მეხსიერების რეესტრშია შესული.
ოთხშაბათს, 10 ივნისს გაიმართება ვირტუალური გამოფენა „საერთაშორისო არქივები“, 11 ივნისს ჩატარდება პროექტი „ძველი და თანამედროვე ბათუმი“, ხოლო 12 ივნისს – ქვიზი „საქართველოს მწვერვალები“.
ყველა ღონისძიება ეროვნული არქივის ვებ-გვერდსა და ოფიციალურ Facebook-გვერდზე გაიმართება.
არქივების საერთაშორისო დღე 2007 წლის 8 ივნისს არქივების საერთაშორისო საბჭომ დააარსა. ეს დღე 1948 წლის 9 ივნისს უკავშირდება, როდესაც გაერთიანებული ერების ორგანიზაციის განათლების, მეცნიერებისა და კულტურის საკითხების განყოფილებამ (UNESCO) არქივების საერთაშორისო საბჭო დააფუძნა. საქართველოს ეროვნული არქივი ამ თარიღს მრავალი წლის განმავლობაში აღნიშნავს.