თბილისი, 25 მაისი — Sputnik. სიცილიაზე პანდემიის დასრულების შემდეგ ჩასულ ტურისტებს უკან დაუბრუნდებათ ავიაბილეთების საფასურის ნახევარი და ასევე სასტუმროს ღირებულების ნაწილი, იუწყება გამოცემა Daily Mail.
გავრცელებული ინფორმაციით, აღნიშნული გადაწყვეტილება რეგიონის ხელისუფლებამ კუნძულზე ტურიზმის აღდგენის სტრატეგიის ფარგლებში მიიღო — სფერო პანდემიის ფონზე ძლიერ დაზარალდა.
ცნობილი ხდება, რომ სტრატეგიის თანახმად, ტურისტებს, გარდა ავიაბილეთების ღირებულების 50%-ისა, ასევე გადაუხდიან სასტუმროში ცხოვრების ყოველი მესამე ღამის საფასურს. ამასთან, სიცილიაზე მოგზაურობის მსურველებს სრულიად უფასოდ გადაეცემათ მუზეუმებისა და არქეოლოგიური აღმოჩენების ადგილების ბილეთები, რომელთა საშუალო ფასი მანამდე 13 ევროს ფარგლებში მერყეობდა.
ვაუჩერები ხელმისაწვდონი იქნება საიტზე Visit Sicily.
გამოცემის ცნობით, სიცილიის ხელისუფლება ტურიზმის აღდგენის პროგრამაზე 50 მლნ ევროს დახარჯვას აპირებს, რაც პანდემიის დროს განცდილ დანაკარგზე ბევრად ნაკლებია. მიმდინარე წლის მარტო ორ თვეში — მარტსა და აპრილში ტურისტულმა ინდუსტრიამ დაახლოებით ერთი მილიარდი ევრო იზარალა.
ამასთან ცნობილი ხდება, რომ სიცილიის მსგავს სქემას აამუშავებს იაპონიაც. ქვეყნის ტურისტული სააგენტო აპირებს წარმოადგინოს სფეროს სუბსიდირების გეგმა 12,5 მლრდ დოლარის მოცულობით.
გეგმის დეტალები ჯერჯერობით არ საჯაროვდება, თუმცა The Japan Times-ის ინფორმაციით, ტურისტული სააგენტო ქვეყანაში ჩასულ სტუმრებს დანახარჯის 50%-ს დაუფარავს.