თბილისი, 12 მაისი — Sputnik. საქართველოში უსიმპტომო პაციენტების რაოდენობა ცოტაა და მათი რაოდენობა კორონავირუსით ინფიცირებული პაციენტების საერთო რაოდენობის ერთ ან ორ პროცენტს შეადგენს, განაცხადა თბილისის ინფექციური საავადმყოფოს დირექტორმა თენგიზ ცერცვაძემ.
მისი სიტყვებით, საერთაშორისო სტატისტიკა და ქართული გამოცდილება აჩვენებს, რომ შემთხვევების 80%-ში დაავადება მსუბუქად მიდის. დაახლოებით 14-15% მძიმე შემთხვევებზე მოდის. რაც შეეხება კრიტიკულ პაციენტებს, რომლებიც ინტენსიურ თერაპიას საჭიროებენ, მსოფლიო სტატისტიკით მათი რაოდენობა 5%-ია, ქართული სტატისტიკით კი 4%.
„სინამდვილეში ძალიან ცოტაა აბსოლუტურად უსიმპტომო პაციენტები, რომლებსაც ტემპერატურაც ნორმალური აქვთ და კორონავირუსისთვის დამახასიათებელი არც ერთი სიმპტომი არ აღენიშნებათ. ეს შეიძლება ერთი-ორი პროცენტი იყოს, მეტი არა. მსუბუქი და მცირე სიმპტომიანი პაციენტები კი გაცილებით მეტია“, – განაცხადა ცერცვაძემ საზოგადოებრივი მაუწყებლის პირველ არხზე.
ცერცვაძემ ასევე აღნიშნა, რომ კორონავირუსით სიკვდილიანობის პროცენტული მაჩვენებელი საფრანგეთში 19,5%-ია, გერმანიაში - 4,5%, საქართველოში კი 1,5%. ამასთან, მან განმარტა, რომ საქართველოს მოქალაქეებმა სიფრთხილე მომავალშიც უნდა გამოიჩინონ.
სპეციალისტმა ასევე კომენტარი გააკეთა კორონავირუსის მქონე პაციენტების ბინაზე მკურნალობის უცხოურ პრაქტიკაზე. მისი განცხადებით, ასეთ შემთხვევებში ჰოსპიტალიზაცია გაცილებით ეფექტურია.
„ჩვენთან პაციენტის მდგომარეობა როცა დამძიმდება, მას ექიმები თავზე ადგანან, პირველივე საათში აღმოუჩენენ დახმარებას, ხოლო უცხოეთში პაციენტმა თავად უნდა იზრუნოს იმაზეც, რომ რეანიმაციულ განყოფილებამდე მივიდეს, ზოგჯერ რიგში დგომა უწევს და ა.შ. ანუ, იქ დაგვიანებით უწევენ დახმარებას. თქვენ როგორ ფიქრობთ, რატომ გვაქვს ლეტალურ შემთხვევებში ასე დიდი განსხვავება?“ – აღნიშნა ცერცვაძემ.
12 მაისის მონაცემებით, საქართველოში კორონავირუსი 639 ადამიანს დაუდასტურდა, გამოჯანმრთელდა 349 პაციენტი, გარდაიცვალა 11 პირი.