თბილისი, 9 მაისი - Sputnik. კორონავირუსით ინიფიცირების ახალი წყაროები არ არის და ვიმედოვნებთ, რომ არ გაგვიჩნდება, განაცხადა თბილისის ინფექციური კლინიკის სამედიცინო დირექტორმა მარინა ეზუგბაიამ.
მისი განცხადებით, ბოლო დღეებში გამოვლენილი კორონავირუსის შემთხვევების ყველა წყარო ცნობილია.
„ბოლო 10 დღეა ხედავთ, რომ ყველა პაციენტი არის არსებული წყაროს კონტაქტები, ან საკარანტინო სივრცეში არსებული პირები, რომლებიც პაციენტებად გადაიქცევიან დადასტურების შემდეგ. ახალი წყარო არ არის და ვიმედოვნებთ, რომ არ გაგვიჩნდება“, – განაცხადა მარინა ეზუგბაიამ.
ინფექციური კლინიკის სამედიცინო დირექტორის განცხადებით, ახალი პაციენტები ინფექციურ საავადმყოფოში არ შეუყვანიათ. ამ ეტაპზე კლინიკაში 42 პაციენტი წევს, ერთი არის შესაძლო შემთხვევა, 41 კი - დადასტურებული.
„გვყავს ერთი კრიტიკული პაციენტი და ერთი მძიმე. ორივე პაციენტთან სიმძიმის განმსაზღვრელი არის თან არსებული დაავადებები. გამოჯანმრთელებული პაციენტებიდან ჩვენთან სამია და ჩვენი ცენტრის გამოჯანმრთელებული პაციენტების რაოდენობა უკვე 85-ს მიუახლოვდა“, – განაცხადა ეზუგბაიამ.
ბოლო მონაცემებით, საქართველოში ახალი კორონავირუსი 626 ადამიანს დაუდგინდა. გამოჯანმრთელდა 297 ადამიანი, გარდაიცვალა – 10, კარანტინის რეჟიმში იმყოფება 4702, ხოლო სტაციონარებში დაკვირვების ქვეშ 459 პაციენტია.
ასევე კორონავირუსის დიაგნოზით უცხოეთიდან სამშობლოში გადმოყვანილია საქართველოს სამი მოქალაქე.
საქართველოში კორონავირუსის პირველი შემთხვევა 26 თებერვალს დაფიქსირდა.