თბილისი, 14 აპრილი — Sputnik. საქართველოში სააღდგომო დღესასწაულების დროს შეიძლება საფლავებზე გასვლასთან დაკავშირებით შეზღუდვები დაწესდეს, განაცხადა საქართველოს პრემიერ–მინისტრმა გიორგი გახარიამ სამშაბათს გამართულ ბრიფინგზე.
მართლმადიდებლური სამყარო 19 აპრილს აღდგომის დღესასწაულს აღნიშნავს. ეს ერთ-ერთი ყველაზე მასშტაბური დღესასწაულია საქართველოში. აღდგომის მერე დღეს, ტრადიციულად, ხსოვნის დღე აღინიშნება და მოსახლეობა საფლავებზე გადის. ხელისუფლების აზრით, ეს გაზრდის ქალაქში ადამიანების მობილობას, რაც კორონავირუსის გავრცელების რისკს წარმოადგენს.
„მესმის, რომ ეს არ არის მარტივი გადაწყვეტილება, თუმცა ეს შესაძლებელია. ამ გადაწყვეტილებას ჩვენ მივიღებთ უახლოეს ორ დღეში და რა თქმა უნდა, მოსახლეობას წინასწარ გავაფრთხილებთ. დიდი ალბათობით, ჩვენ მოგვიწევს გარკვეული შეზღუდვების დაწესება გარკვეული პერიოდით“, – განაცხადა გახარიამ.
მისი სიტყვებით, ეს სამწუხარო ფაქტია, „მაგრამ ყველას უნდა გვესმოდეს, რომ ჩვენ ახლა ვართ ბრძოლაში და ამ ბრძოლის ხაზი გადის ყველგან.
გარდა ამისა, საქართველოს მთავრობამ სამშაბათს მიიღო გადაწყვეტილება ქვეყნის მთელ ტერიტორიაზე საგანგებო მდგომარეობის 10 მაისამდე გაგრძელების შესახებ.
დღეისათვის საქართველოში მოქმედებს კომენდანტის საათი და სამზე მეტი პირის შეკრების აკრძალვა – დამრღვევი სამი ათასი ლარით ჯარიმდება.