თბილისი, 13 აპრილი – Sputnik. ბოლო 24 საათის განმავლობაში, სამართალდამცველების მიერ განხორციელებული მონიტორინგის შედეგად, მთელი ქვეყნის მასშტაბით, საგანგებო მდგომარეობის რეჟიმის და ე.წ. კომენდანტის საათის შეზღუდვების დარღვევის 104 ახალი ფაქტი გამოვლინდა, ნათქვამია შსს-ს ვებგვერდზე გავრცელებულ განცხადებაში.
საგანგებო მდგომარეობა გამოცხადდა 21 მარტს, ხოლო 31 მარტიდან ქვეყანაში დაწესდა კომენდანტის საათი - 21:00 საათიდან 06:00 საათამდე, რა დროსაც მოქალაქეებს სპეციალური ნებართვის გარეშე გარეთ გასვლა ეკრძალებათ.
გასულ ღამეს ე.წ. კომენდანტის საათის დარღვევის ფაქტზე, მთელი ქვეყნის მასშტაბით 73 მოქალაქე დააჯარიმეს. საჯარო სივრცეში 3-ზე მეტი პირის შეკრების შეზღუდვის და 2-მეტრიანი სოციალური დისტანციის დაუცველობის გამო, ჯარიმა მხოლოდ 16 მოქალაქეს დაეკისრა.
თვითიზოლაციის წესების დარღვევის 2 ახალი ფაქტი გამოვლინდა.
მგზავრთა გადაყვანისა და ავტომობილით გადაადგილების წესის დარღვევის ფაქტზე 9 პირი დაჯარიმდა.
ეკონომიკურ საქმიანობასთან დაკავშირებული შეზღუდვების დარღვევის ფაქტზე დაჯარიმდა 4 ფიზიკური პირი.
საგანგებო მდგომარეობის რეჟიმის დარღვევა იწვევს ადმინისტრაციულ პასუხისმგებლობას – ფიზიკური პირის დაჯარიმებას 3 000 ლარით, ხოლო იურიდიული პირის – 15 000 ლარით.
საგანგებო მდგომარეობა და კომენდანტის საათი ახალი კორონავირუსის გავრცელების შეკავების მიზნით დაწესდა.
საქართველოში კორონავირუსით ინფიცირების პირველი შემთხვევა 26 თებერვალს დაფიქსირდა. 13 აპრილისთვის დაავადებულთა რიცხვი 266-მდე გაიზარდა. აქედან სამი გარდაიცვალა, 67 კი გამოჯანმრთელდა. კიდევ სამი პირი სხვა ქვეყნებიდან სამკურნალოდ ჩამოიყვანეს.