თბილისი, 9 აპრილი — Sputnik. მოსკოვმა და ერ-რიადმა მოახერხეს ძირითადი უთანხმოებების მოგვარება ნავთობის მოპოვების მორიგ შემცირებასთან დაკავშირებით, იუწყება გაზეთი The Wall Street Journal.
გამოცემის ცნობით, OPEC+ (OPEC-ის ქვეყნები და რუსეთი, ყაზახეთი და აზერბაიჯანი) და სხვა ქვეყნები მუშაობენ იმაზე, თუ როგორ უნდა ამოიღონ ბაზრიდან 20 მილიონი ბარელი დღეში. აღინიშნა, რომ რუსეთი და საუდის არაბეთი ახლოს არიან შეთანხმებასთან, რომელიც დღეში მინიმუმ 10 მილიონი ბარელით შემცირებას გულისხმობს.
ხუთშაბათს ვიდეოკონფერენციის ფორმატით გაიმართება OPEC + ქვეყნების სხდომა, რომელზეც იმსჯელებენ ნავთობის მოპოვების მორიგი შემცირების შესაძლებლობებზე ბაზარზე არსებული ვითარების სტაბილიზაციის მიზნით. პარასკევს კი ენერგობაზრების სტაბილურობის თემაზე G20-ის ენერგეტიკის მინისტრების შეხვედრა გაიმართება.
6 მარტს, კორონავირუსის პირობებში OPEC+ ქვეყნების ჩაშლილმა სხდომამ ბაზრის მხარდაჭერის საკითხზე გარიგების შეწყვეტა გამოიწვია. მაშინ ვერ მოხერხდა ვერც რუსეთის მიერ შემოთავაზებული წინადადების მიღება შეთანხმების გახანგრძლივებაზე, რათა შემდგომში უფრო გაწონასწორებული გადაწყვეტილება იქნას მიღებული, ვერც საუდის არაბეთის იდეის, რომელიც მოპოვების დღე-ღამეში კიდევ 1.5 მილიონი ბარელით შემცირებას გულისხმობდა.
შედეგად, მსოფლიო ბაზრებზე ნავთობის კოტირებები ჩამოიშალა. ეს მოხდა კორონავირუსის ეპიდემიის ფონზე, რომელიც პირდაპირ ურტყამს მოთხოვნას. იმ პირობებში, როდესაც კარანტინის გამო, ადამიანების გადაადგილება შეზღუდულია, ხოლო საწარმოები დაკეტილია, საწვავის მიმართ ინტერესი მკვეთრად მცირდება.