თბილისი, 9 აპრილი — Sputnik. ადამიანისთვის ცნობილი შვიდი კორონავირუსიდან ოთხი გრიპის მსგავს სეზონურ ეპიდემიებს იწვევს და მასავით გადაეცემა ადამიანიდან ადამიანს, ამ დასკვნამდე მივიდნენ მიჩიგანის უნივერსიტეტის (აშშ) საზოგადოებრივი ჯანდაცვის სკოლის მეცნიერები, ნათქვამია MedicalXpress-ის საიტზე გამოქვეყნებულ პრეს-რელიზში.
იმ ფაქტმა, რომ დაავადების შემთხვევათა უმეტესობა ზამთრის თვეებში ფიქსირდება, შეიძლება კორონავირუსის პანდემიის სავარაუდო პიკის თარიღიც განსაზღვროს, ამტკიცებენ კვლევის ავტორები.
მეცნიერების თქმით, ცნობილი კორონავირუსებით ინფიცირების შემთხვევათა უმეტესობა დეკემბრიდან აპრილ-მაისამდე პერიოდში ფიქსირდება, პიკი კი იანვარ-თებერვალზე მოდის. შემთხვევების მხოლოდ 2,5% ვლინდება ივნისიდან სექტემბრამდე პერიოდში.
მკვლევარების თქმით, მიუხედავად იმისა, რომ სეზონური კორონავირუსები კავშირშია COVID-19-ის გამომწვევ SARS-CoV-2-თან, ჯერჯერობით მაინც უცნობია, როგორ მოიქცევა ეს უკანასკნელი.
„მიუხედავად იმისა, რომ მიჩიგანში აღმოჩენილი სეზონური კორონავირუსები SARS-CoV-2-თანაა კავშირში, ჩვენ ჯერ არ ვიცით, მოიქცევა თუ არა ის სეზონური კორონავირუსების მსგავსად. მხოლოდ დრო გვაჩვენებს, დარჩება თუ არა SARS-CoV-2 რესპირატორული ინფექციების ლანდშაფტში ხანგრძლივად, თუ საერთოდ გაქრება ადამიანებიდან“, - განაცხადა ეპიდემიოლოგიის პროფესორმა არნოლდ მონტომ.
ჯონს ჰოპკინსის უნივერსიტეტის სპეციალური პროექტის მონაცემებით, ახალი კორონავირუსით ინფიცირებულთა რაოდენობამ მსოფლიოს 184 ქვეყანაში, ვირუსის აფეთქების მომენტიდან დღემდე, 1 484 811 ადამიანი შეადგინა, აქედან გარდაცვლილია 88 538 და განკურნებულია 329 826 პაციენტი.
ამასთან, ამ დროისათვის ინფიცირებულთა რაოდენობით პირველ პოზიციაზეა აშშ — 432 132 ინფიცირებულით, მეორეზე — ესპანეთი (148 220), მესამეზე — იტალია (139 422).
ქვეყნების რაოდენობამ, სადაც COVID-19-ით დაავადებულთა რიცხვმა ათასს გადააჭარბა, ამ დროისათვის 62-ს შეადგენს. ამ ნიშნულის ზღვარზეა კიდევ რამდენიმე სახელმწიფო.