თბილისი, 3 აპრილი – Sputnik. ვანო სარაჯიშვილის სახელობის თბილისის სახელმწიფო კონსერვატორიამ ქვეყნის მრავალ სასწავლო-კულტურულ ორგანიზაციას მიბაძა და ონლაინ-კონცერტების ჩვენება დაიწყო. კონცერტს კონსერვატორია თავის Facebook-გვერდზე აანონსებს.
პარასკევს, 3 აპრილს გაიმართება ონლაინ-კონცერტი – ბოროდინის სახელობის რუსეთის სახელმწიფო სიმებიანი კვარტეტის გამოსვლა, რომელიც ერთ-ერთი მნიშვნელოვანი სიმებიანი კვარტეტია რუსეთში და ასევე ერთ-ერთი უძველესი ანსამბლი მსოფლიოში, რომელიც უწყვეტად მართავს კონცერტებს.
მსმენელისთვის აჟღერდება 2017 წლის კონცერტი, რომელიც თბილისის კონსერვატორიის დიდ დარბაზში გაიმართა საერთაშორისო ფესტივალი „საშობაო შეხვედრების“ ფარგლებში.
ტრანსლაცია 19:00 საათზე დაიწყება.
ბოროდინის კვარტეტი 1945 წელს დაარსდა.