თბილისი, 2 აპრილი – Sputnik. საქართველოს მობილური ოპერატორების მიერ ცალკეული აბონენტებისთვის UCKEBA-ს სახელით დაგზავნილი მოკლე ტექსტური შეტყობინებები კომენდანტის საათის დარღვევისთვის დაჯარიმებაზე შინაგან საქმეთა სამინისტროს არ დაუგზავნია, ნათქვამია უწყების ვებგვერდზე გამოქვეყნებულ განცხადებაში.
ბოლო პერიოდში, საქართველოს მობილური ოპერატორების ცალკეულ აბონენტებს UCKEBA-ს სახელით დაეგზავნათ მოკლე ტექსტური შეტყობინებები, შემდეგი შინაარსით: „თქვენ დაჯარიმდით კომენდანტის საათის დარღვევის გამო, ჯარიმის ოდენობა 3000 ლარი. R.M. police.ge".
„ზემოაღნიშნული მოკლე ტექსტური შეტყობინებები არ არის გაგზავნილი შინაგან საქმეთა სამინისტროს მიერ და არ შეესაბამება სიმართლეს“, - აღნიშნულია განცხადებაში
უწყების ცნობით, აღნიშნულ და სხვა ანალოგიურ ფაქტებზე მიმდინარეობს შესწავლა, რომელთაც საქართველოს კანონმდებლობით დადგენილი წესით მოჰყვება შესაბამისი რეაგირება.