ზაქირ აივაზლი ილიას უნივერსიტეტის სამართლის ფაკულტეტის სტუდენტია.
- ზაქირ, ამჟამად სად ხართ?
- ამჟამად მარნეულის რაიონის სოფელ აღმამედლოში ვარ.
- რა ხდება, კარანტინის წესებს თუ იცავს მოსახლეობა?
- როგორც ვიცი, მარნეულში ცხოვრება ჩვეულებრივად გრძელდება. ადამიანები ისევ ისე გადაადგილებიან. მათ კარგად არ იციან რა მოხდა, ან როგორ უნდა მოიქცნენ. მარნეულში ასეა და სოფლებში ხომ საერთოდ წარმოდგენა არ აქვთ.
- ანუ ინფორმაციის ნაკლებობაა?
- დიახ, მარნეულშიც კი ქართული ძალიან ცოტამ იცის, ამიტომ საჭიროა, რომ ვინმე ჩამოვიდეს და აზერბაიჯანულ ენაზე განუმარტოს ამ ხალხს რა ხდება და როგორ უნდა მოიქცნენ. თორემ კარანტინის წესებზე წარმოდგენა არ აქვთ...
- სიფრთხილის ზომებსაც არ იცავენ?
- რომ გაფრთხილდნენ, უნდა იცოდნენ რა მოხდა. ქართულ არხებზე კი გამოაცხადეს, მაგრამ აქ ქართული არ იციან. ადგილობრივები სოფლის მეურნეობას მისდევენ და იმის ეშინიათ, თუ სად გაყიდიან პროდუქტებს და ფულს როგორ იშოვიან. ამიტომ, ვიმეორებ, აქ ვინმე უნდა ჩამოვიდეს და ამ ხალხს აზერბაიჯანულ ენაზე განუმარტოს რა ხდება და როგორ უნდა მოიქცნენ...
საგანგებო მდგომარეობის ფარგლებში საქართველოს მთავრობამ წუხელ მარნეულისა და ბოლნისის რაიონებში მკაცრი საკარანტინო რეჟიმი დააწესა. საკარანტინო რეჟიმის დაწესება აუცილებელი გახდა იმის გამო, რომ მარნეულში დადასტურდა ინფიცირების შიდა გადაცემის შემთხვევა სარიტუალო ღონისძიების დროს, რომელსაც ამ ორი რაიონიდან რამდენიმე ათეული ადამიანი ესწრებოდა.
მარნეულისა და ბოლნისის რაიონებში საკარანტინო შეზღუდვების დაცვასა და საზოგადოებრივ წესრიგს უზრუნველყოფენ შინაგან საქმეთა სამინისტრო და მასთან კოორდინირებულად მოქმედი თავდაცვის სამინისტრო.