თბილისი, 18 მარტი - Sputnik. ინტენსიური თოვისა და ზვავსაშიშროების გაზრდილი საფრთხის გამო საერთაშორისო მნიშვნელობის მცხეთა–სტეფანწმინდა–ლარსის(რუსეთის ფედერაციის საზღვარი) საავტომობილო გზის მლეთა-გუდაურის 80-87-ე კმ მონაკვეთზე ყველა სახის ტრანსპორტის მოძრაობა აკრძალულია.
ტრანსპორტის მოძრაობა აკრძალულია კვლავ გუდაური(ფოსტა)–კობის და დარიალი-ლარსის (126-137-ე კმ) მონაკვეთებზე.
რუსეთის საზღვრისკენ მიმავალ ავტომაგისტრალზე ტრანსპორტის მოძრაობა ორშაბათს დილით ინტენსიური თოვის შედეგად ზვავსაშიშროების გამო აიკრძალა.
ადრე ეკონომიკის მინისტრმა ნათია თურნავამ განაცხადა, რომ ლარსზე ძალიან დიდი რიგი შეიქმნა - სურსათით დატვირთული ათასზე მეტი ტრაილერი, ხოლო ქვეყანაში შექმნილი აჟიოტაჟის გამო ბურღულეულზე გარკვეული დეფიციტი შეიქმნა.
მცხეთა-სტეფანწმინდა-ლარსის ე.წ. სამხედრო გზა ამჟამად ერთადერთი სახმელეთო გზაა, რომელიც საქართველოსა და სომხეთს რუსეთთან აკავშირებს. „ზემო ლარსის“ საბაჟო-გამშვები პუნქტი კი ერთადერთი მოქმედი გამშვები პუნქტია საქართველოსა და რუსეთის სახმელეთო საზღვარზე.