თბილისი, 4 მარტი — Sputnik. საქართველოში სომხეთის მთავრობის მეთაურის ნიკოლ ფაშინიანის ორდღიანი ოფიციალური ვიზიტი დასრულდა.
სომხეთის დელეგაცია თბილისის საერთაშორისო აეროპორტში საქართველოს პრემიერ-მინისტრმა გიორგი გახარიამ გააცილა.
ვიზიტის ფარგლებში ფაშინიანმა შეხვედრები გამართა ქართველ კოლეგა გიორგი გახარიასთან, ქვეყნის პრეზიდენტ სალომე ზურაბიშვილთან, პარლამენტის სპიკერ არჩილ თალაკვაძესთან, საქართველოს კათალიკოს-პატრიარქ ილია მეორესთან და საგარეო საქმეთა მინისტრ დავით ზალკალიანთან.
ეს ფაშინიანის მეორე ოფიციალური ვიზიტი იყო საქართველოში. მთავრობის მეთაურის რანგში ფაშინიანი ჩვენს ქვეყანას პირველად 2018 წლის მაისში ეწვია.
საქართველომ და სომხეთმა დიპლომატიური ურთიერთობა 1992 წლის 17 ივლისს დაამყარეს. მხარეები სხვადასხვა მიმართულებით თანამშრომლობენ. ყველაზე ინტენსიურია თანამშრომლობა ვაჭრობის სფეროში. ქვეყნებს შორის თავისუფალი ვაჭრობის რეჟიმი მოქმედებს, სომხეთი საქართველოს ძირითადი სავაჭრო პარტნიორების ათეულში შედის.