თბილისი, 10 თებერვალი — Sputnik. თბილისში კლუბ "აკადემიის" 16 წლის მორაგბე ზურა ბურჯანაძე დღეს გარდაიცვალა, ნათქვამია „ქართული რაგბის" Facebook-გვერდზე.
„ვუსამძიმრებთ გარდაცვლილის ოჯახს, მეგობრებსა და ახლობლებს", – ნათქვამია განცხადებაში.
ცნობილია, რომ მოზარდი სიმსივნეს ებრძოდა.
კლუბი „აკადემია" თბილისის სამხატვრო აკადემიის ბაზაზე 1983 წელს დაარსდა. 2003 წელს „სტუდენტები" საქართველოს ჩემპიონატზე მესამე ადგილზე გავიდნენ, შემდეგ კი, ზედიზედ ორი წლის განმავლობაში – 2004, 2005 წლებში „ვერცხლი" მოიპოვეს.
აღსანიშნავია, რომ ახლახან, 26 იანვარს საფრანგეთში მომხდარ ავტოავარიას ემსხვერპლა ფრანგული კლუბ Graulhetois-ს მოთამაშე, 28 წლის ბექა ბურდიაშვილი. ფრანგულ მედიაში გავრცელებული ინფორმაციით, ავარია მაშინ მოხდა, როდესაც სპორტსმენი კლუბ Lavaur-თან მორიგ თამაშზე მიემგზავრებოდა. მან ავტომობილის საჭე ვერ დაიმორჩილა და გზის სავალი ნაწილიდან გადავიდა.