თბილისი, 20 იანვარი — Sputnik. ბრიტანეთის სამეფო ოჯახი პრინც ჰარისა და მეგან მარკლს ტიტულებს ჩამოართმევს, ნათქვამია ბუკინგემის სასახლის საიტზე.
გავრცელებული ინფორმაციით, მიმდინარე წლის გაზაფხულიდან წყვილი აღარ შეასრულებს სამეფო ოჯახის წევრების ვალდებულებებს და აღარ იწოდებიან „სამეფო უდიდებულესობად“.
გარდა ამისა, მათ ასევე შეუწყდებათ ფინანსების გამოყოფა ოფიციალური ღონისძიებებისთვის.
აღსანიშნავია, რომ ჰარი და მეგან მარკლი აპირებენ უკან დაუბრუნონ ხაზინას ის თანხა, რომელიც ფროგმორ-კოტეჯის რემონტზე დაიხარჯა და რომელიც მათ საცხოვრებლად რჩება ბრიტანეთში. ფროგმორ-კოტეჯის რემონტი გადასახადების გადამხდელებს 2,5 მლნ გირვანქა სტერლინგი დაუჯდათ.
დედოფალ ელისაბედის თქმით, ამგვარ გადაწყვეტილებამდე სამეფო ოჯახი რამდენიმეთვიანი მსჯელობის შემდეგ მივიდა. მან ხაზი გაუსვა, რომ მეგან მარკლი, პრინცი ჰარი და არჩი ჰარისონი ოჯახის საყვარელ წევრებად რჩებიან.
დედოფალმა მადლობა გადაუხადა სასექსის ჰერცოგსა და ჰერცოგინიას სამსახურისთვის და აღნიშნა, რომ მეგან მარკლი „ძალიან მალე გახდა ოჯახის სრულუფლებიანი წევრი“.
8 იანვარს პრინცმა ჰარიმ და მეგან მარკლმა უარი თქვეს სამეფო ოჯახის წევრობაზე — სასექსის ჰერცოგისა და ჰერცოგინიას ტიტულების შენარჩუნებით. წყვილი აცხადებდა, რომ სურდათ უარი ეთქვათ სახელმწიფო ბიუჯეტიდან თანხების მიღებაზე, რათა ფინანსურად დამოუკიდებლები ყოფილიყვნენ.