თბილისი, 15 იანვარი — Sputnik. თელავის რაიონის სოფელ ვანთაში 31 წლის ორსული, სავარაუდოდ, გრიპის ვირუსით გარდაიცვალა, წერს გაზეთი „რეზონანსი".
ამ ინფორმაციას რეგიონული საინფორმაციო სააგენტო ადასტურებს.
გრიპი უკან არ იხევს: ჰოსპიტალიზაციის შემთხვევები გახშირდა>>
მერიის წარმომადგენლის გიორგი ნაპირელის თქმით, ქალს მაღალი ტემპერატურა ჰქონდა, მაგრამ, მიუხედავად ამისა, როგორც ჩანს, არ მიმართა ექიმს.
„ჩვენმა ექიმმა რომ ნახა, უკვე გული გაჩერებული იყო. ოჯახი უკიდურესად გაჭირვებულია, ძალიან მძიმე ამბავი დაატყდათ თავს", – აღნიშნა ნაპირელმა.
ქალი 21 კვირის ორსული იყო. კლინიკიდან მიღებული ინფორმაციით, სადაც ის აღრიცხვაზე იმყოფებოდა, ორსულობა გართულებების გარეშე მიმდინარეობდა.
ფაქტზე აღძრულია საქმე და მიმდინარეობს გამოძიება.