თბილისი, 3 იანვარი – Sputnik. საქართველოს საგარეო საქმეთა მინისტრმა დავით ზალკალიანმა კომენტარი გააკეთა ერაყში მომხდარ მოვლენებზე და აღნიშნა, რომ ბაღდადში ძალადობის გამო შეშფოთებულია.
ბაღდადში აშშ–ის დიპლომატიური კორპუსი სამშაბათს საპროტესტო აქციის მონაწილეებმა დაარბიეს. ერაყელები აღაშფოთა ამერიკულმა ავიაშეტევამ, რომლის შედეგად ლიკვიდირებული იყო შიიტური ფორმირების „ქათაიბ ჰესბოლას“ 25 მებრძოლი.
„შეშფოთებულნი ვართ ერაყში ესკალაციითა და ძალადობით. ვგმობთ ბაღდადში აშშ-ის საელჩოზე ბოლოდროინდელ თავდასხმას. დიპლომატიური მისიების უსაფრთხოება და დაცვა ვენის კონვენციის შესაბამისად უნდა იყოს უზრუნველყოფილი“, – განაცხადა ზალკალიანმა, იუწყება პირველი არხი.
საპროტესტო აქციები აშშ–ის საელჩოსთან ამერიკული უპილოტო საფრენების მიერ განხორციელებული შეტევების შედეგად „ქათაიბ ჰესბოლას“ დაღუპული წევრების დასაფლავების შემდეგ დაიწყო. მიტინგი ოთხშაბათს გაგრძელდა. ამერიკელმა სამხედროებმა დემონსტრანტების წინააღმდეგ კიდევ ერთხელ გამოიყენეს ცრემლსადენი გაზი.
აშშ–ში, თავის მხრივ, განაცხადეს, რომ შეტევის გადაწყვეტილება იმის გამო მიიღეს, რომ ერაყულ ბაზებზე „ქათაიბ ჰესბოლა“ შეტევებს განაგრძობს. პენტაგონში განმარტეს, რომ ეს იყო პასუხი ერაყში განთავსებულ ბაზებზე თავდასხმებზე, რა დროსაც დაიღუპა აშშ-ის ერთი მოქალაქე და დაიჭრა ოთხი ამერიკელი სამხედრო. გარდა ამისა, ვაშინგტონმა თეირანი „ჰესბოლას“ დაფინანსებაში დაადანაშაულა.