თბილისი, 31 ოქტომბერი — Sputnik. ხობში მომხდარი ავარიის შედეგად დაშავებული მამაკაცი გარდაიცვალა, იუწყება „Sputnik-საქართველოს“ კორესპონდენტი ზუგდიდიდან.
ავტოსაგზაო შემთხვევა ხობის მუნიციპალიტეტის სოფელ ჭალადიდთან გუშინ, საღამოს მოხდა. სატვირთო ავტომანქანა, რომელიც ქვა-ღორღით იყო დატვირთული, გზის სავალი ნაწილიდან გადავიდა, ხეს შეეჯახა და ამოტრიალდა. შემთხვევის შედეგად დაშავდა სატვირთოს მძღოლი, რომლის მანქანიდან ამოყვანას მაშველები რამდენიმე საათის განმავლობაში ვერ ახერხებდნენ.
48 წლის მამაკაცი ქუთაისის რეფერალური საავადმყოფოს ეზოს ტერიტორიაზე, სასწრაფო-სამედიცინო სამსახურის მანქანაში გარდაიცვალა. მედიკოსების შეფასებით, მას ტრავმული შოკი, ხანგრძლივი ზეწოლის სინდრომი და პოლიტრამვა აღენიშნებოდა.
შსს-ს ინფორმაციით, მომხდართან დაკავშარებით გამოძიება სსკ-ის 276-ე მუხლის მეორე ნაწილით დაიწყო.
ნიკა ლატარია