თბილისი, 24 სექტემბერი — Sputnik. სამართალდამცველებმა ბათუმის საერთაშორისო აეროპორტში ნარკოტიკების უკანონო შემოტანის ბრალდებით სამხრეთ აფრიკის მოქალაქე დააკავეს, ნათქვამია შსს-ს ვებ-გვერდზე გავრცელებულ განცხადებაში.
უცხოეთის მოქალაქე მაშინ დააკავეს, როდესაც იგი საქართველოში 16 კილოგრამი მარიხუანის შემოტანას ცდილობდა. საქმის სხვა დეტალები არ საჯაროვდება.
გამოძიება განსაკუთრებით დიდი ოდენობით ნარკოტიკული საშუალების უკანონო შეძენა-შენახვა-გადაზიდვისა და განსაკუთრებით დიდი ოდენობით ნარკოტიკული საშუალების საქართველოში უკანონოდ შემოტანის ფაქტებზე მიმდინარეობს, რაც 15-დან 20 წლამდე ვადით თავისუფლების აღკვეთას ითვალისწინებს.
მიუხედავად ამ მოცულობისა, ეს არ არის ქართველი სამართალდამცველების ყველაზე მსხვილი "ნადავლი". ივნისში შსს-მ თბილისის საერთაშორისო აეროპორტში სამხრეთ აფრიკის მოქალაქე დააკავა, რომელიც საქართველოში 20 კგ მარიხუანის შემოტანას ცდილობდა. 2019 წლის იანვარში კი საქართველო-სომხეთის საზღვარზე ირანის მოქალაქე დააკავეს, რომელსაც 8,5 კილოგრამი ჰეროინი აღმოაჩნდა.