თბილისი, 22 სექტემბერი — Sputnik. სამების საკათედრო ტაძარში ჩვილ ბავშვთა მე-60 ნათლობა გაიმართება, იუწყება საზოგადოებრივი მაუწყებლის პირველი არხი.
სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი, ბიჭვინთისა და ცხუმ-აფხაზეთის მიტროპოლიტი, უწმინდესი და უნეტარესი ილია მეორე კიდევ 800-მდე ბავშვის ნათლია გახდება. ახალმონათლულ ბავშვებს ნათლობის მოწმობები და ჯვრები გადაეცემათ.
საყოველთაო ნათლობა დღის მეორე ნახევარში დაიწყება. 20:00 საათისთვის კი სამების საკათედრო ტაძარში ილია მეორე ნათლულებს დალოცავს.
საყოველთაო ნათლობის იდეა თავად კათოლიკოს-პატრიარქს ეკუთვნის და მისი მიზანი ქვეყანაში დემოგრაფიული მდგომარეობის გამოსწორებაა. ილია მეორე ჯვარდაწერილი ოჯახების მესამე და მომდევნო შვილებს ნათლავს.
ილია მეორემ საქართველოს მთავარი ეროვნული ფასეულობა დაასახელა >>
პირველი საყოველთაო ნათლობა სამების ტაძარში 2008 წლის 19 იანვარს გაიმართა. კათოლიკოს-პატრიარქს ამ დროისთვის 38 175 ათასი ნათლული ჰყავს.