საქართველოში ჯარიმების ამნისტია გამოცხადდა

თბილისი, 19 სექტემბერი — Sputnik. საქართველოს პარლამენტმა დაამტკიცა იუსტიციის სამინისტროს ინიციატივა, რომელიც მოსახლეობის ყველაზე მოწყვლად ფენებს ადმინისტრაციული ჯარიმების გადასახადისგან გაათავისუფლებს, ნათქვამია იუსტიციის სამინისტროს მიერ გავრცელებულ განცხადებაში.

ამნისტია და გამკაცრებული პასუხისმგებლობა... ანუ შენების ახალი წესები... >>

ამნისტია შეეხება სოციალურად დაუცველებს, პენსიონერებს, ომისა და თავდაცვის ძალების ვეტერანების, არასრულწლოვნებს, შშმ პირებს, მარტოხელა მშობლებსა და დევნილებს.

საუბარია 37,3 ათას დარღვევაზე და 23,5 მილიონი ლარის ჯარიმა-საურავების ჩამოწერაზე.

ჯარიმები ჩამოეწერება იმათ, ვინც ადმინისტრაციული სამართალდარღვევა 2019 წლის 15 იანვრამდე ჩაიდინა. ამნისტია არ შეეხება მხოლოდ თბილისში პარკირების წესების დამრღვევებს.

„აღსრულების ეროვნულ ბიუროსა და მის თანამშრომლებს ხშირად იმ ადამიანების შეწუხება უწევთ, რომელთაც ისედაც უამრავი პრობლემა აქვთ. ყოველდღიურ რეჟიმში ახსენებენ – გადაიხადე ესა თუ ის თანხა! ამ კანონით კი ასეთი ზეწოლა აღარ იქნება“, – განაცხადა თეა წულუკიანმა.