თბილისი, 17 სექტემბერი — Sputnik. საქართველოში აჯიკის ფესტივალი უკვე მეორედ ჩატარდება, წელს ის მთაწმინდის პარკში 21 სექტემბერს გაიმართება, ნათქვამია ორგანიზატორების განცხადებაში.
ფესტივალზე აჯიკის ყველაზე საუკეთესო მწარმოებელს გამოავლენენ. მის სახელს განსაზღვრავს პროფესიონალი ჟიური შეფ-მზარეული ლევან კობიაშვილის ხელმძღვანელობით. ესაა ფესტივალის ერთ-ერთი მთავარი სიახლე.
ყველაზე გემრიელ აჯიკას სამ ნომინაციაში გამოავლენენ: წითელი, მწვანე და მშრალი აჯიკა. ფესტივალის სტუმრები არაერთ ფასეულ ინფორმაციას მიიღებენ მცირე და საშუალო ბიზნესის წარმომადგენლების მხრიდან აჯიკის წარმოებასა და რეალიზაციაზე.
აჯიკის გარდა, ფესტივალის ფარგლებში წარმოდგენილი იქნება სხვა პროდუქტიც: ტყემალი, საწებელი, სვანური მარილი, ტრადიციული სუნელები და სხვ.
ფესტივალს ესტუმრებიან ფერმერები საქართველოს სხვადასხვა რეგიონიდან, რომლებიც ისაუბრებენ ჯანმრთელობისთვის უსაფრთხო და ეკოლოგიურად სუფთა საკვების წარმოებაზე.
აჯიკის ფესტივალი პირველად 2018 წელს ზუგდიდში ჩატარდა.