თბილისი, 30 აგვისტო — Sputnik. სერიალი „ჩემი ცოლის დაქალები“ შემოდგომიდან ეთერში ახალ ტელეკომპანია „ფორმულაზე“ გავა, რომელმაც გუშინ მაუწყებლობის უფლება მიიღო. ინფორმაციას სოციალურ ქსელში სერიალის სცენარისტი ქეთი დევდარიანი ავრცელებს.
დევდარიანი ამავე არხზე ახალ სერიალსაც აანონსებს. „ფორმულა კრეატივმა“ მაუწყებლობის უფლების მისაღებად საქართველოს კომუნიკაციების ეროვნულ კომისიას 13 აგვისტოს მიმართა, თუმცა შევსებულ დოკუმენტებში ხარვეზი დაუდგინდა და გამოსასწორებლად ვადა მისცეს.
არხი თავდაცვის ყოფილ მინისტრთან დავით კეზერაშვილთან პარტნიორობით იქმნება.
„ფორმულა კრეატივი“ ცნობილია მისი მთავარი პოპულარული პროდუქტით, ყველაზე წარმატებული ქართული სერიალით „ჩემი ცოლის დაქალები“, რომელსაც კომპანია „რუსთავი 2“-ის დაკვეთით იღებდა. ის ასევე ინტერნეტ-გამოცემა On.ge-ს მეწილეცაა. გარდა ამისა, „კრეატივის“ გუნდს ეკუთვნის ფილმები „რაც ყველაზე ძალიან გიყვარს“, „ტაქსი“, „ჭამა და სექსი“, ასევე მრავალი კომპანიის სარეკლამო რგოლი და ხმაურიანი კამპანია.