თბილისი, 19 აგვისტო — Sputnik. „Sputnik-საქართველოს" მკითხველების უმრავლესობა – 57,4% მიიჩნევს, რომ ლარის კურსის ვარდნის მიზეზი მთავრობის საქმიანობაა. ამაზე მეტყველებს სააგენტოს ვებ-გვერდზე ონლაინ-გამოკითხვის შედეგები.
პრემიერი: ლარის კურსი სტაბილური გახდება>>
ლარის კურსის დაცემის მთავარ მიზეზად საგარეო ფაქტორებს მიიჩნევს გამოკითხულთა 23,4%, ხოლო ეროვნული ბანკის საქმიანობის შედეგად მიაჩნია 12,8%-ს.
ეროვნული ვალუტის ვარდნის მიზეზი არის პანიკა მოსახლეობაში – ასე მიიჩნევს მკითხველის 6,4%.
ლარის კურსი დოლარის მიმართ 20 ივნისიდან 6,6%-ით დაეცა. თუ 20 ივნისს ეროვნული ბანკის მიერ გამოცხადებული ლარის ოფიციალური კურსი დოლარის მიმართ 2,7871 იყო, 1 აგვისტოს ამ მაჩვენებელმა ახალ ანტირეკორდს მიაღწია – 2,9718.
ეროვნულმა ბანკმა 1 აგვისტოს აუქციონზე 32 მილიონ დოლარზე მეტი გაყიდა, რის შემდეგაც ლარი 1,4%-ით გამყარდა, თუმცა ლარის გაცვლითმა კურსმა 8 აგვისტოდან კვლავ ვარდნა დაიწყო – 2,9338 GEL/$.
ეროვნულმა ბანკმა 19 აგვისტოს ეროვნული ვალუტის გაცვლითი კურსი დოლართან მიმართებით 2,9232 GEL/$1 ნიშნულზე დაადგინა.
ეროვნული ვალუტის გაცვლითი კურსი: პასუხისმგებლობა, მოლოდინები, პროგნოზები>>
მანამდე საქართველოს პრემიერ-მინისტრმა მამუკა ბახტაძემ განაცხადა, რომ ლარი ზედმეტად გაუფასურდა და ამას ხელი შეუწყო ბოლო კვირებში შექმნილმა ნეგატიურმა ფონმა და, შესაბამისად, აქედან გამომდინარე ნეგატიურმა მოლოდინებმა.