თბილისი, 10 ივნისი — Sputnik. ტელეწამყვანმა ლევან როსტოშვილმა, რომელიც ნარკოტიკული საშუალების შეძენა-შენახვისთვის იხდიდა სასჯელს, 23 მაისს სასჯელაღსრულების დაწესებულება ვადაზე ადრე დატოვა. ინფორმაცია Imedinews-ს პენიტენციურ სამსახურში დაუდასტურეს.
პენიტენციურ დაწესებულებაში აცხადებენ, რომ ლევან როსტოშვილი N16 დაბალი რისკის პენიტენციურ დაწესებულებაში იხდიდა სასჯელს და აქტიურად ჩართული იყო სხვადასხვა სარეაბილიტაციო აქტივობაში. მსჯავრდებულის სასჯელის მოხდის ვადა 2020 წლის 7 იანვარს სრულდებოდა, თუმცა დაკისრებული სასჯელიდან ორ წელზე მეტი მოიხადა და მიმდინარე წლის 23 მაისს პირობით ვადამდე გათავისუფლდა.
ლევან როსტოშვილი და ლაშა კურტანიძე 2016 წლის 5 მაისს დააკავეს. გამოძიების ინფორმაციით, მათ 42.9524 გრამი ნარკოტიკული საშუალება MDMA აღმოაჩნდათ. საქმე სისხლის სამართლის კოდექსის 260-ე მუხლის მე-6 ნაწილით აღიძრა, რაც ნარკოტიკული საშუალების, მისი ანალოგის, პრეკურსორის ან ახალი ფსიქოაქტიური ნივთიერების უკანონო დამზადებას, წარმოებას, შეძენას, შენახვას, გადაზიდვას, გადაგზავნას ან გასაღებას გულისხმობს.
„იაფი ნარკოტიკი - გამოწვევაა საქართველოსთვის“ - ექსპერტმა ნარკომანიის პრობლემებზე ისაუბრა >>>
მაშინ ლევან როსტოშვილს 8 წელი, ლაშა კურტანიძეს კი 5 წელი მიუსაჯეს. 2017 წელს კი გავრცელდა ცნობა, რომ პროკურატურამ სააპელაციო სასამართლოში საპროცესო შეთანხმება გააფორმა ნარკოდანაშაულში მსჯავრდებულ ტელეწამყვან ლევან როსტოშვილთან და მსახიობ ლაშა კურტანიძესთან, რის შედეგადაც მათ სასჯელები შეუმცირდათ. კერძოდ, ლაშა კურტანიძეს ერთ წლამდე შეუმცირდა, ხოლო ლევან როსტოშვილს სამ წლამდე. გარდა ამისა, თითოეულ მათგანს 40 ათასი ლარის გადახდა დაეკისრათ.