თბილისი, 22 მაისი — Sputnik. ქართველმა სუმოისტმა ლევან გორგაძემ (ტოჩინოშინი) საკმაოდ მოულოდნელად წააგო ორთაბრძოლა საზაფხულო ნაცუ ბაშოზე შეჯიბრების მე-11 დღეს. ტურნირი ამ დღეებში ტოკიოში მიმდინარეობს.
გორგაძე დასავლეთის მეოთხე მაეგაშირა აბის (კოსკე ჰორიკირი) შეხვდა. გორგაძემ ვერ მოახერხა მეტოქის ქამარში ჩავლება და დოჰიოს მიღმა აღმოჩნდა.
ეს შედეგი მოულოდნელი აღმოჩნდა იმდენად, რამდენადაც ეს სპორტსმენების მეოთხე დაპირისპირება იყო. წინა სამი ორთაბრძოლა ტოჩინოშინმა მოიგო.
ტოჩინოშინმა საზაფხულო ნაცუ ბაშოზე მეორედ წააგო. ამჟამად გორგაძის ბალანსია 9:2, მას ოძეკის ტიტულის დასაბრუნებლად დარჩენილ ოთხ ორთაბრძოლაში ერთი მოგება სჭირდება.
ამ წაგებამ ტოჩინოშინი სატურნირო ცხრილში მეორე ადგილზე გადაიყვანა, რომელსაც ის იოკუძუნა კაკურიოსთან იყოფს. შეჯიბრების 11 დღის შემდეგ ერთპიროვნული ლიდერი გახდა დასავლეთის მერვე მაეგაშირა ასანოიამა (ჰიროკი ისიბასი).
ტოჩინოშინის შემდეგი მეტოქე ნაცუ ბაშოზე დასავლეთის მეშვიდე მაეგაშირა მეისეი გახდება. ამ დრომდე სუმოისტები ერთმანეთს არ შეხვედრიან.