თბილისი, 25 აპრილი - Sputnik. საქართველოს ექს-პრეზიდენტი და ოდესის ყოფილი გუბერნატორი მიხეილ სააკაშვილი დარწმუნებულია, რომ პეტრო პოროშენკი ყველანაირად შეუშლის ხელს უკრაინის ახლად არჩეულ პრეზიდენტ ვლადიმირ ზელენსკის, იუწყება პორტალი Strana.ua
შესაბამისად, სააკაშვილი მოუწოდებს არჩეულ პრეზიდენტს, დააპატიმროს წინამორბედი.
„პოროშენკო არ დამშვიდდება. მისი თავისუფლებაზე დატოვება შეცდომაა. ის ყველანაირად შეეცდება „შეუჩიჩხინოს“ ზელენსკის... თუ მის წინააღმდეგ სისხლის სამართლის საქმეები არ აღიძვრება, ამ კეთილშობილებას მაინც არ დააფასებს“, — განუცხადა სააკაშვილმა Страна.ua-ს ჟურნალისტს.
მისი თქმით, პოროშენკო ნებისმიერ კეთილშობილურ ჟესტს სისუსტედ აღიქვამს და როგორც კი შანსი გაუჩნდება, მაშინვე დანას ჩასცემს მოწინააღმდეგეს ზურგში, ვინაიდან „ძველი ბიჭის“ ფსიქოლოგია აქვს.
სააკაშვილს მიაჩნია, რომ ზელენსკი მზადაა ახალი თანამდებობისთვის. ოდესის ყოფილი გუბერნატორი ამბობს, რომ ყურადღებით უყურა ზელენსკის ფილმებს და მივიდა დასკვნამდე, რომ უკრაინის ახალმა პრეზიდენტმა ამ ფილმებში უკვე იწინასწარმეტყველა ყველა ის სირთულე, რომლებიც ელოდება. გამომდინარე აქედან, შოუმენმა და მსახიობმა იცის, რაზეც მიდის.