თბილისი, 17 მარტი — Sputnik. შინაგან საქმეთა სამინისტროს იმერეთის რაჭა-ლეჩხუმისა და ქვემო სვანეთის პოლიციის დეპარტამენტის ზესტაფონის სამმართველოს თანამშრომლებმა 41 წლის მ. კ. ცხელ კვალზე ძარცვის ბრალდებით დააკავეს, ნათქვამია უწყების მიერ გავრცელებულ განცხადებაში.
დაკავებული წარსულში მრავალჯერ ნასამართლევი პირია.
გამოძიებამ დაადგინა, რომ მ.კ.-მ მიმდინარე წლის 17 მარტს, ზესტაფონის საკოლმეურნეო ბაზარში ქალბატონს ჩანთა გასტაცა და შემთხვევის ადგილიდან მიმალვა სცადა. ბაზრის მიმდებარე ტერიტორიაზე სამსახურებრივ მოვალეობას ასრულებდა უბნის უფროსი ინსპექტორ-გამომძიებელი, პოლიციის მაიორი რატი კუპრაძე, რომელიც მ.კ.-ს დაედევნა და მისი დაკავება მალევე შეძლო.
პოლიციამ გატაცებული ჩანთა და მასში მოთავსებული ფული - 600 ლარი ნივთმტკიცებად ამოიღო.
გამოძიება ძარცვის ფაქტზე მიმდინარეობს, საქართველოს სისს სამართლის კოდექსის 178-ე მუხლის მე-2 ნაწილის "ა" ქვეპუნქტით. დანაშაული 4-დან 6 წლამდე ვადით თავისუფლების აღკვეთას ითვალისწინებს.