თბილისი, 12 მარტი — Sputnik. საგანგებო სიტუაციების ახმეტის სახანძრო-სამაშველო სამსახურის თანამაშრომელი სამსახურებრივი მოვალეობის შესრულების დროს დაიღუპა, იუწყება საზოგადოებრივი მაუწყებლის პირველი არხი.
შემთხვევა ახმეტის მუნიციპალიტეტის სოფელ ნადუქნარში დღეს მოხდა.
გავრცელებული ინფორმაციით, 34 წლის მაშველი სოფლის სასაფლაოზე გაჩენილი ხანძრის ჩაქრობას ცდილობდა. მას მოძრავ სპეცდანიშნულების მანქანაზე ასვლისას ფეხი გაუცურდა და ავტომობილის ქვეშ ჩავარდა.
მამაკაცი ადგილზე გარდაიცვალა.
შემთხვევის ადგილზე მობილიზებულია პილიცია და ექსპერტ-კრიმინალისტები. ტარდება საგამოძიებო მოქმედებები.
შინაგან საქმეთა სამინისტრომ გამოძიება 276-ე მუხლის მეხუთე ნაწილით დაიწყო, რაც სატრანპორტო საშუალების უსაფრთხოების ან ექსპლუატაციის წესების დარღვევას გულისხმობს, რამაც გამოიწვია ადამიანის სიცოცხლის მოსპობა.