თბილისი, 11 იანვარი — Sputnik. ბათუმში 63 წლის მამაკაცი გრიპის ვირუსის გართულებით გარდაიცვალა, განაცხადა აჭარის ჯანდაცვისა და სოციალური დაცვის მინისტრმა ზაალ მიქელაძემ.
ეს ბათუმში გრიპის ვირუსის შედეგად გარდაცვალების მეხუთე შემთხვევაა. ოფიციალური მონაცემებით, საქართველოს მასშტაბით „ღორის გრიპის" ვირუსით უკვე 15 ადამიანი გარდაიცვალა.
„შემთხვევა დღეს დილით ბათუმის მედიცინის ცენტრში მოხდა, ლაბორატორიულად დადასტურებამდე ინფორმაცია არ გავრცელებულა, ლაბორატორიულმა დასკვნამ დაადასტურა, რომ მამაკაცი ნამდვილად გრიპით გარდაიცვალა, თუმცა მას ჰქონდა სხვა რისკფაქტორებიც", – განაცხადა საზოგადოებრივი მაუწყებლის პირველ არხზე ზაალ მიქელაძემ.
ხუთშაბათის მონაცემებით, საქართველოში გრიპის ვირუსით დაავადებულთა ჰოსპიტალიზების რაოდენობა გაიზარდა - დაახლოებით 845 ადამიანი. ლაბორატორიულმა კვლევამ 158 შემთხვევაში „ღორის გრიპი" დაადასტურა.
ქვეყანაში ეპიდემია არ არის, მაგრამ ჯანდაცვის სამინისტრო მოსახლეობას მოუწოდებს პირველი სიმპტომებისთანავე მიმართონ ექიმს. დღეისათვის 100 ათას მოსახლეზე გრიპისმაგვარი ვირუსით 256 ადამიანია დავადებული. ეპიდემიად კი მიიჩნევა შემთხვევა, როდესაც 100 ათას ადამიანზე დაავადებულთა რიცხვი 400-450 დაავადებულს აღწევს.