თბილისი, 30 ნოემბერი — Sputnik. ძლიერმა ქარმა იმერეთისა და სამეგრელო-ზემო სვანეთის რეგიონებს პრობლემები შეუქმნა, იუწყება საგანგებო სიტუაციების მართვის სამსახური.
უწყების ინფორმაციით, დღის განმავლობაში იმერეთის რეგიონიდან 210 შეტყობინება შევიდა. ძლიერმა ქარმა ამ რეგიონში სახურავი გადახადა 60 საცხოვრებელ სახლს, წააქცია 25 ხე და დააზიანა 5 ავტომანქანა.
რეგიონში მობილიზებულია 150 მეხანძრე-მაშველი, რომლებიც ამ წუთებშიც აწარმოებენ სამაშველო ღონისძიებებს.
ძლიერმა ქარმა პრობლემები შექმნა სამეგრელო-ზემო სვანეთის რეგიონშიც – ქარმა რამდენიმე საცხოვრებელი სახლის სახურავი გადახადა და წააქცია ხეები.
იმერეთსა და სამეგრელო ზემო– სვანეთში სტიქიის შედეგად არავინ დაშავებულა.