თბილისი, 15 ნოემბერი — Sputnik. საგანგებო სიტუაციების მართვის სამსახურის თანამშრომლებმა ჟინვალის წყალსაცავში იპოვეს ბეტონმზიდის 53 წლის მძღოლის ცხედარი, რომელიც გუშინ, საღამოს ავტოსაგზაო შემთხვევის შედეგად წყალში გადავარდა, იუწყება ტელეკომპანია Rustavi2.
ჟინვალი-თვალივის საავტომობილო გზაზე სამუშაოების შესრულებისას, ავტოსაგზაო შემთხვევის შედეგად, ბეტონმზიდი გზიდან გადავიდა და ჟინვალჰესის წყალსაცავში ჩავარდა. მანქანაში მხოლოდ მძღოლი იმყოფებოდა.
გუშინვე შემთხვევის ადგილზე მაშველებისა და მყვინთავების 20-კაციანი ჯგუფი მუშაობდა, თუმცა გვიან ღამით მამაკაცის სამძებრო-სამუშაოები ცუდი ხილვადობის გამო შეწყდა.
სამძებრო სამუშაო დღეს, დილის 07:30 საათიდან განახლდა.
შინაგან საქმეთა სამინისტროს ინფორმაციით, ჟინვალი-თვალივის საავტომობილო გზაზე სამუშაოებს ერთ-ერთი კერძო კომპანია ასრულებს.
მომხდარ ფაქტთან დაკავშირებით გამოძიება საქართველოს სსკ-ის 276 მუხლით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.