თბილისი, 28 ოქტომბერი — Sputnik. საპარლამენტო უმრავლესობის ლიდერმა მამუკა მდინარაძემ ტელეკომპანია „რუსთავი 2“ საარჩევნო კანონმდებლობის უხეშ დარღვევაში დაადანაშაულა.
დღეს საქართველო ქვეყნის რიგით მეხუთე პრეზიდენტს 25 კანდიდატს შორის ირჩევს. კანონმდებლობის თანახმად, ხმის მიცემის დღეს საარჩევნო უბნებზე და მედიით აგიტაცია იკრძალება.
„კანონმდებლობის უხეში დარღვევა დაფიქსირდა სამაუწყებლო კომპანია „რუსთავი 2-ის“ ეთერში, როდესაც პარტიულმა ტელევიზიამ უგულვებელყო არჩევნების დღეს აგიტაციის აკრძალვის პრინციპი და გუშინდელი ღამე, ანუ დღევანდელი დღე უკვე 12 საათიდან დაუთმო ჩვენს მიერ მხარდაჭერილი კანდიდატის ანტირეკლამას, ცილისწამებას და შეურაცხყოფას“, - განაცხადა მდინარაძემ.
მმართველ პარტიაში არაერთხელ აცხადებდნენ, რომ „რუსთავი 2“ ყოფილი მმართველი პარტიის, „ერთიანი ნაციონალური მოძრაობის“ ინტერესებს ემსახურება.
„გუშინ, გვიან ღამით, დაფიქსირდა რამდენიმე შემთხვევა, როდესაც „ნაციონალური მოძრაობის“ წარმომადგენლები ცდილობდნენ უბანში შესვლას ვიდეოკამერების დამონტაჟების მიზნით, რაც ასევე ეწინააღმდეგება საარჩევნო კანონმდებლობას“, - აღნიშნა მამუკა მდინარაძემ.
დღეს საქართველოს მოსახლეობა ქვეყნის რიგით მეხუთე პრეზიდენტს ირჩევს 6 წლის ვადით. ეს პრეზიდენტის პირდაპირი წესით არჩევის ბოლო შემთხვევაა, ვინაიდან ქვეყანა მმართველობის საპარლამენტო მოდელზე გადადის და ამიერიდან პრეზიდენტს საარჩევნო კოლეგია აირჩევს.
საქართველოს მოქალაქეებს არჩევანის გაკეთება 25 კანდიდატს შორის მოუწევს, რომელთაგან 19 პოლიტიკური პარტიის, ხოლო ექვსი საინიციატივო ჯგუფის მიერაა წარდგენილი.
ცესკოს მონაცემებით, საპრეზიდენტო არჩევნებზე 3 მილიონ 518 ათას 877 ამომრჩეველია რეგისტრირებული.