თბილისი, 14 ოქტომბერი — Sputnik. ხობის მუნიციპალიტეტის სოფელ პატარა ფოთში „ოპელის“ მარკის ავტომობილი ხეს შეეჯახა და აალდა, იუწყება საზოგადოებრივი მაუწყებლის პირველი არხი.
მომხდარის შედეგად დაშავდა ავტომანქანის მძღოლი. სასწრაფო სამედიცინო დახმარების ჯგუფმა დაშავებული ფოთის ცენტრალურ კლინიკურ საავადმყოფოში გადაიყვანა. ექიმების თქმით, მისი ჯანმრთელობის მდგომარეობა სტაბილურია.
„გამოძახებისას ადგილზე დაგვხვდა ცეცხლმოკიდებული მსუბუქი ავტომანქანა. ოპერატიული რეაგირების შედეგად, მალევე მოხდა ცეცხლის ლიკვიდირება. შემთხვევას მსხვერპლი არ მოჰყოლია“, – აცხადებს მეხანძრე- მაშველი გრიგოლ არჩილია.
შემთხვევის ადგილზე მობილიზებულია სახანძრო-სამაშველო სამსახური და პოლიცია.