თბილისი, 16 სექტემბერი — Sputnik. სამართალდამცველებმა ბათუმში 55 წლის მამაკაცი ქურდობის ბრალდებით დააკავეს, ნათქვამია საქართველოს შინაგან საქმეთა სამინისტროს მიერ გავრცელებულ განცხადებაში.
საქმის მასალებით ირკვევა, რომ ბრალდებულმა მ.ს.-მ ბათუმში, რუსთაველის ქუჩაზე ტურისტების დროებითი საცხოვრებელი ბინიდან სხვადასხვა სახის ნივთები და თანხა მოიპარა.
სამართალდამცველებმა ბრალდებული ცხელ კვალზე დააკავეს. პოლიციამ, დაკავებულის პირადი ჩხრეკის შედეგად, ნაქურდალი ნივთები და თანხა ნივთმტკიცებად ამოიღო.
„მ.ს.-ს საცხოვრებელი სახლის ჩხრეკისას ამოღებულია: მაკაროვის სისტემის ცეცხლსასროლი პისტოლეტი, მჭიდი, 8 ვაზნა, ოქროსა და ვერცხლის სამკაულები, კარის საკეტების გასაღები ხელსაწყოები, მობილური ტელეფონები, კომპიუტერული ტექნიკა და ფული“, — ნათქვამია განცხადებაში.
ჩხრეკის შედეგად ამოღებული ნივთების იდენტიფიცირების მიზნით შესაბამისი საგამოძიებო მოქმედებები ტარდება.
უწყების ცნობით, ბრალდებული წარსულში მრავალგზის ნასამართლევია.
გამოძიება ქურდობის ფაქტზე, საქართველოს სსკ-ის 177-ე მუხლის მე-3 ნაწილის „გ“ ქვეპუნქტით მიმდინარეობს. აღნიშნული დანაშაული 4-დან 7 წლამდე ვადით თავისუფლების აღკვეთას ითვალისწინებს.