თბილისი, 5 აგვისტო – Sputnik. შსს–ს დროებითი მოთავსების იზოლატორებში სამედიცინო პერსონალის გადამზადების ახალი ეტაპი დაიწყო, აღნიშნულია უწყების ვებ–გვერდზე განთავსებულ განცხადებაში.
ტრენინგები მედიკოსებისთვის, სამედიცინო პერსონალის დასაქმების პროექტის ფარგლებში, ევროპის საბჭოს ორგანიზებითა და დაფინანსებით ხორციელდება.
ექიმებს ოთხდღიანი კურსი ჩაუტარდათ, რომელიც ითვალისწინებს სწავლებას გადამდები დაავადებების, დაზიანებების დოკუმენტირებისა და ფსიქიკური ჯანმრთელობის საკითხების შესახებ.
შინაგან საქმეთა სამინისტრო პროექტს, ევროპის საბჭოს მხარდაჭერით, 2014 წლიდან ახორციელებს.
„პროექტის მიზანია დროებითი მოთავსების იზოლატორებში სათანადო პირობების შექმნით, იზოლატორების პერსონალისთვის ტრენინგებისა და მუშაობის ახალი სტანდარტების დანერგვის გზით ადამიანის უფლებების დაცვის უზრუნველყოფა“, – აღნიშნულია უწყების განცხადებაში.
აღნიშნული კურსი სამედიცინო პერსონალის გადამზადების პროცესის მეორე ეტაპია.