თბილისი, 28 ივლისი — Sputnik. შინაგან საქმეთა მინისტრი გიორგი გახარია აშშ-ში ოფიციალური ვიზიტის ფარგლებში აშშ-ს ფედერალური ბიუროს ხელმძღვანელს კრისტოფერ რეის შეხვდა, ნათქვამია უწყების მიერ გავრცელებულ განცხადებაში.
შეხვედრაზე მხარეებმა განიხილეს ისეთი საკითხები, როგორიცაა ტრანსსასაზღვრო ორგანიზებული დანაშაულისა და კიბერდანაშაულის წინააღმდეგ ბრძოლა, კიბერდანაშაულის კუთხით სამინისტროს წინაშე არსებული გამოწვევები.
მხარეები შეთანხმდნენ, რომ ცენტრალური კრიმინალური პოლიციის გამომძიებლები გადამზადდებიან გამოძიების ფედერალური ბიუროს აკადემიაში. ასევე ქართველი სამართალდამცველები ტრანსსასაზღვრო და საერთაშორისო ორგანიზებულ დანაშაულთან ბრძოლის პროცესში ჩაერთვებიან.
შინაგან საქმეთა მინისტრი დელეგაციასთან ერთად აშშ-ს გამოძიების ფედერალური ბიუროს აკადემიაში სწავლების მეთოდებს გაეცნო. აღნიშნულ აკადემიაში მსოფლიოს სხვადასხვა ქვეყნების წარმომადგენლებთან ერთად პერიოდულად საქართველოს შინაგან საქმეთა სამინისტროს თანამშრომლებიც გადიან მომზადებას.