თბილისი, 20 ივლისი — Sputnik. საქართველო იკავებს მე-80 ადგილს 2018 წლის „გლობალური მონობის ინდექსში“ (The Global Slavery Index 2018), რომელიც უფლებადამცველმა ორგანიზაციამ Walk Free Foundation-მა შეადგინა.
კვლევის თანახმად, საქართველოში 17 000 ადამიანი წარმოადგენს მონას. Walk Free Foundation-ის ანგარიშში თანამედროვე მონობის ქვეშ იგულისხმება ადამიანის ექსპლუატაციის სხვადასხვა სახეობა, რა დროსაც ის იძულებულია განახორციელოს გარკვეული საქმიანობა მუქარის, ძალადობის, იძულების, სასტიკი მოპყრობის ან მოტყუების გამო.
კვლევა 167 ქვეყანაში ჩატარდა. ყველაზე დაბალი მაჩვენებლის მქონე ქვეყანა რეიტინგში პირველ პოზიციას იკავებს.
რეიტინგში საქართველოს გვერდით არის აზერბაიჯანი, რომელმაც 79-ე ადგილი დაიკავა, ასევე რუმინეთი, რომელიც 81-ე ადგილზეა.
რაც შეეხება საქართველოს უახლოეს მეზობლებს, აზერბაიჯანის გარდა, ყველაზე ცუდი მდგომარეობა თურქეთშია (48-ე ადგილი), შემდეგ მოდის რუსეთი (64-ე ადგილი) და სომხეთი (68-ე ადგილი).
მონობის ინდექსში პირველი ადგილი დაიკავა კორეის სახალხო დემოკრატიულმა რესპუბლიკამ. „ცუდ“ ათეულში შევიდნენ ასევე ერიტრეა, ბურუნდი, ცენტრალური აფრიკის რესპუბლიკა, ავღანეთი, მავრიტანია, ჩრდილოეთ სუდანი, პაკისტანი, კამბოჯა და ირანი.
შრომის საერთაშორისო ორგანიზაცია: მსოფლიოში 40 მლნ თანამედროვე მონაა >>
ყველაზე კარგი სიტუაციაა იაპონიაში (167-ე ადგილი), კანადაში (166), ტაივანში (165), ახალ ზელანდიაში (164), ავსტრალიაში (163), ჩილეში (162), მავრიკიზე (161), ურუგვაიში (160), კოსტა-რიკაში (159) და აშშ-ში (158).
ორგანიზაციის 2016 წლის მონაცემების თანახმად, თანამედროვე მონობის პირობებში 40,3 მილიონი ადამიანი ცხოვრობს. მონობაში მყოფი ადამიანებიდან უმრავლესობა ქალები და გოგონებია, რაც დაახლოებით 29 მილიონს შეადგენს (საერთო რაოდენობის 71%).
სხვადასხვა ქვეყნებში მონობის დონის კვლევის შედეგები Walk Free Foundation-მა პირველად 2013 წელს წარადგინა. მაშინ საქართველოს მონაცემები უარესი იყო: 162 ქვეყანას შორის თანამედროვე მონების რაოდენობის მიხედვით 50-ე ადგილი.