თბილისი, 29 ივნისი — Sputnik. გურჯაანში, სოფელ ახაშენში მომხდარმა ხანძარმა ორი წლის გოგონა იმსხვერპლა, იუწყება საზოგადოებრივი მაუწყებლის პირველი არხი.
შემთხვევა სოფელ ახაშენში დღეს, დაახლოებით 13:00 საათზე მოხდა. ცეცხლი ყაჭიურების ორსართულიან სახლს გაუჩნდა. მეხანძრეებმა გოგონას ცხედარი ორსართულიანი სახლის მეორე სართულზე იპოვეს. სახლში ორი მცირეწლოვანი ბავშვი იმყოფებოდა, ერთ-ერთი მათგანის გამოყვანა მეხანძრეებმა შეძლეს. დამწვარია დაახლოებით 225 კვადრატული მეტრი ფართობი.
შემთხვევის ადგილზე სახანძრო–სამაშველო ბრიგადები და საპატრულო პოლიციაა მობილიზებული.
მომხდარ ფაქტზე გამოძიება დაწყებულის სსკ-ის 188-ე მუხლით, რაც გულისხმობს ნივთის დაზიანებას ან განადგურებას გაუფრთხილებლობით.