თბილისი, 23 მაისი — Sputnik. ახალგაზრდული ფორუმი „რუსკოიე ზარუბეჟიე“ დასრულდა სანქტ-პეტერბურგში, მასში მონაწილეობა მიიღეს 43 ქვეყნის წარმომადგენელმა, მათ შორის საქართველოდან ორი ადამიანი იყო.
რიგით მე-11 პეტერბურგის ახალგაზრდული ფორუმი 16 მაისს დაიწყო და 22 მაისს დასრულდა. ღონისძიებაზე სხვადასხვა ქვეყნის 73 დელეგატი შეიკრიბა, მათ შორის კანადიდან, აშშ-დან, ისრაელიდან, ესპანეთიდან, ლატვიიდან, ესტონეთიდან, ყირგიზეთიდან, უზბეკეთიდან, უკრაინიდან, რუმინეთიდან, ისრაელიდან და სხვა ქვეყნებიდან.
ყოველწლიურად ფორუმი სამი პარალელური სექციის ფორმატში მიმდინარეობს — „ეკონომიკა“, „ხელოვნებათმცოდნეობა“ და „მედია“. თემატური ლექციების, მასტერ-კლასების, პრაქტიკული მეცადინეობების გარდა, ფორუმის მონაწილეებისათვის გაიმართა ექსკურსიები ქალაქში, თეატრის და ბიბლიოთეკების სტუმრობა.
„იმედი მაქვს, რომ ფორუმზე მიღებული ახალი ცოდნა და პრაქტიკული უნარები თქვენს პიროვნულ და პროფესიულ ზრდას შეუწყობს ხელს და თქვენს საქმიანობაში უფრო კონკურენტუნარიანს გაგხდით“, — ფორუმის დახურვის ცერემონიაზე განაცხადა სანქტ-პეტერბურგის საგარეო კავშირების კომიტეტის თავმჯდომარის მოადგილემ სერგეი მარკოვმა.
ფორუმის ფარგლებში ღონისძიების მონაწილეები შეხვდნენ მეორე მსოფლიო ომის ვეტერანებს და „ბლოკადნიკებს“, მოინახულეს პისკარიოვსკის მემორიალური სასაფლაო და საფეხბურთო კლუბ „ზენიტის“ ცნობილ მოთამაშეებს გაესაუბრნენ.
ფორუმის მონაწილეებს სპეციალური სერტიფიკატები და სამახსოვრო საჩუქრები გადაეცა. ღონისძიება ორგანიზებულია სანქტ-პეტერბურგის საგარეო კავშირების კომიტეტით რუსეთს საგარეო საქმეთა სამინისტროს მხარდაჭერით.