თბილისი 13 მაისი — Sputnik. ღამის კლუბებში – „ბასიანსა“ და „გალერიში“ ნარკოტიკების რეალიზების ბრალდებით დაკავებულებისთვის აღკვეთის ღონისძიების შეფარდების საკითხზე სასამართლო დღეს იმსჯელებს, იუწყება საზოგადოებრივი მაუწყებლის პირველი არხი.
პროკურატურა სასამართლოს მათი აღკვეთის ღონისძიების საკითხზე დღეს 12:00 საატზე მიმართავს და რვავე დაკავებულის მიმართ აღკვეთის ღონისძიების სახით პატიმრობის შეფარდებას მოითხოვს.
რაც შეეხება დაცვის მხარის პოზიციას, დაკავებულთა ნაწილის ადვოკატები არასაპატიმრო ღონისძიების გამოყენებას მოითხოვენ. ადვოკატები გირაოს თანხასთან დაკავშირებით შეთანხმებას ჯერ დაკავებულის ოჯახის წევრებთან აპირებენ.
ერთ-ერთი დაკავებული ბრალს არ აღიარებს. ადვოკატის განცხადებით, მისი დაცვის ქვეშ მყოფის მიმართ სასამართლომ არც ერთი ტიპის აღკვეთის ღონისძიება არ უნდა გამოიყენოს.
ნარკოტიკული ნივთიერების უკანონო შეძენა-შენახვა-გასაღების მუხლით დაკავებულებს ბრალი გუშინ, დღის ბოლოს წარედგინათ.
შსს–ს სპეციალური დანიშნულების რაზმმა ნარკორეალიზატორების დაკავების მიზნით სპეცოპერაცია 12 მაისს, 01:00 საათზე ერთბაშად ხუთ კლუბში – „ბასიანი“, „გალერი“, „ხიდი“, „მტკვარი“ და „როკიტი“ – ჩაატარა.
შსს–ს მიერ გავრცელებული ინფორმაციით, სპეცოპერაციის შედეგად ნარკოტიკული საშუალების რვა გამსაღებელი პირია დაკავებული, რომლებიც სისტემატურად ახდენდნენ კლუბებში, მათ შორის, „ბასიანსა“ და „გალერიში“ ნარკოტიკული საშუალებების გასაღებას. ბრალდებულთა ნაწილი ნარკორეალიზებას უარყოფს. დაკავებულების უმრავლესობა კი ჯერჯერობით დუმილის უფლებას იყენებს.