თბილისი, 26 აპრილი — Sputnik. საქართველოს ძიუდოისტთა ნაკრებმა ევროპის ჩემპიონატის პირველ დღეს ვერცერთი მედლის მოპოვება ვერ შეძლო. ევროპის ჩემპიონატმა თელ–ავივში სტარტი 26 აპრილს აიღო.
2016 წლის ევროპის ჩემპიონმა 66 კგ–მდე წონით კატეგორიაში ვაჟა მარგველაშვილმა პირველ რაუნდში სენსაციურად დაუთმო გერმანელ მიხაელ ადამს, რომელიც მსოფლიო რეიტინგში 136–ე ადგილზეა.
60 კგ–მდე წონით კატეგორიაში საქართველო ორი ძიუდოისტით იყო წარმოდგენილი – ამირან პაპინაშვილით (5) და ლუხუმ ჩხვიმიანით (12). ჩხვიმიანი, მარგველაშვილის მსგავსად, პირველივე რაუნდში დამარცხდა რუს ბესლან მუდრანოვთან (35).
გაცილებით გამოცდილმა პაპინაშვილმა ნახევარფინალამდე მიაღწია, სადაც ტურნირის გამარჯვებულ რუს ისლამ იაშუევს (17) დაუთმო. ქართველი ძიუდოისტს მხოლოდ ბრინჯაოს მედლის მოპოვების შანსი დარჩა, მაგრამ მესამე ადგილისთვის ორთაბრძოლაში პაპინაშვილი მუდრანოვთან დამარცხდა.
ტურნირის მეორე დღეს – 27 აპრილს, ევროპის ჩემპიონატზე მამაკაცებს შორის მედლების ორი კომპლექტი გათამაშდება. 73 კგ–მდე წონით კატეგორიაში საქართველოს ნაკრებიდან იასპარეზებს ოლიმპიური ჩემპიონი ლაშაი შავდათუაშვილი (4), ხოლო 81 კგ–მდე წონით კატეგორიაში კი ნუგზარ ტატალაშვილი (41).
თელ–ავივში ევროპის ჩემპიონატი 28 აპრილამდე გაგრძელდება.