თბილისი, 17 აპრილი — Sputnik. თბილისში ბარნოვის ქუჩაზე 25 წლის გოგოს მკვლელობაში ბრალდებულ ვეფხია ბაქრაძეს აღკვეთის ღონისძიების სახით წინასწარი პატიმრობა შეეფარდა, იუწყება ტელეარხი Imedi.
13 აპრილს თბილისში, ბარნოვის ქუჩაზე 25 წლის ქალი განსაკუთრებული სისასტიკით, მცირეწლოვანი შვილების თვალწინ მოკლეს. მომხდართან დაკავშირებით შს სამინისტრომ 14 აპრილს, მოკლულის მამინაცვალი, ვეფხია ბაქრაძე თელეთში დააკავა.
როგორც გაირკვა, ბაქრაძე 2015 წელს სასჯელს მეუღლის მიმართ ძალადობის ბრალდებით იხდიდა. აგრეთვე ცნობილი გახდა, რომ ის მეუღლეს გაშორებული იყო და მასთან შერიგებას ცდილობდა, წინააღმდეგ შემთხვევაში კი შვილის მოკვლით ემუქრებოდა. ბაქრაძე ორი წლის შემდეგ საქართველოს პრეზიდენტმა შეიწყალა და მან საპყრობილე 2017 წლის 25 მაისს დატოვა.
დღეს თბილისის საქალაქო სასამართლოს სხდომაზე ვეფხია ბაქრაძისთვის პატიმრობის შეფარდება ბრალდების მხარემ დააყენა. დაცვის მხარე კი სასტიკ დანაშაულში ბრალდებულის გირაოს სახით გათავისუფლებას ითხოვდა. ბაქრაძის ადვოკატმა 20-ათასიანი გირაოს შუამდგომლობა დააყენა.
სასამართლომ პატიმრობა შეუფარდა ვეფხია ბაქრაძის ნათესავსაც, რომელმაც, გამოძიების ინფორმაციით, ბაქრაძე საკუთარ სახლში დამალა და პოლიციას მისი ადგილსამყოფელის შესახებ არ შეატყობინა. მას ორიდან ოთხ წლამდე ვადით თავისუფლების აღკვეთა ემუქრება.
ბრალდებული ვეფხია ბაქრაძის წინააღმდეგ საქმე სსკ-ის 108-ე მუხლით იყო აღძრული. საქმე გადაკვალიფიცირდა და მას ბრალი წარედგინება სსკ-ის 109-ე მუხლით, რაც დამამძიმებელ გარემოებებში განსაკუთრებული სისასტიკით ჩადენილ განზრახ მკვლელობას გულისხმობს. ბრალის დამტკიცების შემთხვევაში ბაქრაძეს 16-იდან 20-წლამდე, ან უვადო პატიმრობა ემუქრება.