თბილისი, 20 მარტი — Sputnik. საქართველო–თურქეთის საზღვარზე „სარფის" საკონტროლო–გამშვებ პუნქტზე 22 მარტს 08:00 საათიდან 20:00 საათამდე პერიოდში მგზავრთა და სატრანსპორტო საშუალებების გატარება შეიზღუდება, ნათქვამია თურქეთის გენერალური საკონსულოს მიერ გავრცელებულ განცხადებაში.
საზღვარზე მიმოსვლის შეჩერება თურქეთის მხრიდან საკონტროლო-გამშვები პუნქტის კომპიუტერული სისტემის ახალ შენობაში გადატანას უკავშირდება, რის გამოც 22 მარტს 12 საათის განმავლობაში მგზავრთა მომსახურება შეუძლებელი იქნება. ასევე, „სარფის" საბაჟო-გამშვებ პუნქტზე შეჩერებული იქნება სატრანსპორტო საშუალებების მოძრაობა.
„დროის ამ მონაკვეთში მგზავრთა და სატრანსპორტო საშუალებების გატარება დროებით იქნება შეჩერებული. თურქეთის მოქალაქეებსა და ქართველ მეგობრებს მადლობას ვუხდით გაგებისთვის", — ნათქვამია ბათუმში თურქეთის გენერალური საკონსულოს მიერ გავრცელებულ ინფორმაციაში.
კომპიუტერული სისტემის გათიშვის გამო, სარფის საბაჟო, ორმხრივად, 7 მარტსაც დაიკეტა. თურქული მხარე, სისტემის გათიშვის შედეგად, რამდენიმე დღის განმავლობაში ვერ ახერხებდა მოქალაქეების გადამოწმებას და საზღვარზე გატარებას.
მსგავსი რამ საქართველო–თურქეთის საზღვარზე ერთი წლის წინაც მოხდა – 2017 წლის სექტემბერში. საბაჟო პროცედურები საკონტროლო პუნქტზე სარეკონსტრუქციო–სამშენებლო სამუშაოების გამო შეფერხებებით მიმდინარეობდა, რამაც თურქულ მხარეზე ავტომობილების დიდი რიგი გამოიწვია.