თბილისი, 21 თებერვალი — Sputnik. მოსკოვის თეატრ „სოვრემენნიკის" (Современник) სპექტაკლები 2018 წლის 16-20 მარტს თბილისის გრიბოედოვის სახელობის რუსული დრამატული თეატრის დიდი დარბაზის სცენაზე გაიმართება.
თეატრის დასი აჩვენებს ორ სპექტაკლს: „ალუბლის ბაღი" ანტონ ჩეხოვის პიესის მიხედვით და „სამი მეგობარი" ერიხ მარია რემარკის რომანის მიხედვით.
„ალუბლის ბაღს" თბილისელები იხილავენ 16 და 17 მარტს, ხოლო „სამ მეგობარს" – 19 და 20 მარტს. სპექტაკლები 19:00 საათზე დაიწყება.
ბილეთები უკვე იყიდება თეატრის სალაროსა (რუსთაველის 2, „გალერია"; ტელეფონი 293 11 06) და ონლაინ.
თეატრი „სოვრემენნიკი" 1956 წელს სსრკ-ის სახალხო არტისტის ოლეგ ეფრემოვის თაოსნობით დაარსდა. ამჟამად თეატრის სამხატვრო ხელმძღვანელია საბჭოთა კავშირის სახალხო არტისტი გალინა ვოლჩეკი.
თეატრისთვის ეს საქართველოში მესამე გასტროლია. ადრე დასი თბილისს 1962 და 1987 წლებში ეწვია.