თბილისი, 12 თებერვალი — Sputnik. საქართველოს ყოფილმა პრეზიდენტმა და ოდესის ოლქის ყოფილმა გუბერნატორმა მიხეილ სააკაშვილმა მხარდამჭერებს მოუწოდა სიმშვიდე შეინარჩუნონ და ხელისუფლებას სიმართლით უპასუხონ.
„ჩვენ ამაზე საკმაოდ მშვიდი რეაქცია უნდა გვქონდეს, მათ სისუტეს სულის სიმტკიცით ვუპასუხოთ, მათ ტყუილს სიმართლით ვუპასუხოთ, ჩვენ მართლები ვართ. ეს არის მეწვრილმანე, იაფფასიანი მატყუარა პოროშენკო, ის არ არის პრეზიდენტი, ის მამაკაციც არ არის, ეს არის უნამუსო ვაჭარი, რომელსაც უკრაინის დაღუპვა უნდა“, — განაცხადა სააკაშვილმა თავის თანამოაზრე დავით საყვარელიძესთან სატელეფონო საუბრისას, რომლის ტრანსლაციას უკრაინული ტელეარხები ახორციელებდნენ.
მისი თქმით, მის მიმართ განხორციელებული ქმედებები „ხელისუფლების სისუსტეს“ აჩვენებს.
სააკაშვილს უკრაინაში ბრალად ედება დანაშაულებრივი ორგანიზაციების წევრების ხელშეწყობა და მათი დანაშაულებრივი საქმიანობის დაფარვა.
გამოძიების ვერსიით, სააკაშვილის გუნდმა უკრაინის ექს-პრეზიდენტ ვიქტორ იანუკოვიჩის გარემოცვისგან 500 000 აშშ დოლარი მიიღო კიევში საპროტესტო აქციების მოსაწყობად, რომლებიც, პროკურატურის თქმით, „სახელმწიფო ძალაუფლების ხელში ჩაგდებას“ ემსახურება.
საქართველომ უკრაინას მისი ექსტრადირების მოთხოვნით არაერთხელ მიმართა, მაგრამ უშედეგოდ. დღეისათვის მას არც საქართველოს, არც უკრაინის მოქალაქეობა არ გააჩნია.