თბილისი, 16 იანვარი — Sputnik. თბილისში, მტკვრის მარჯვენა სანაპიროზე მომხდარი ავტოავარია, დედაქალაქის ამ მონაკვეთში სატრანსპორტო შეფერხების წარმოქმნის მიზეზად იქცა, — იუწყება ტელეკომპანია imedi.
მსუბუქმა ავტომანქანამ, რომელიც სანაპიროზე გადაჭარბებული სიჩქარით მოძრაობდა, ხე მოგლიჯა და ჯებირი გაანგრია.
ავარიის შედეგად ორი ადამიანი დაშავდა, რომლებიც ღუდუშაურის კლინიკაში გადაიყვანეს.
როგორც შინაგან საქმეთა სამინისტროს პრეს-სამსახურში აცხადებენ, მომხდართან დაკავშირებით გამოძიება საქართველოს სისხლის სამართლის კოდექსის 276-ე მუხლის პირველი ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს (-ისჯება ჯარიმით ან თავისუფლების შეზღუდვით ვადით სამ წლამდე ანდა თავისუფლების აღკვეთით იმავე ვადით, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ).