თბილისი, 24 ოქტომბერი — Sputnik. 2016 წლის იანვარ-სექტემბერში საქართველოს აეროპორტები 2,2 მილიონ ადამიანს მოემსახურა, რაც 23%-ით მეტია გასული წლის ანალოგიურ მაჩვენებელზე.
2012 წლის 9 თვის მაჩვენებელთან შედარებით ავიაკომპანიების მიერ გადაყვანილ მგზავრთა რაოდენობა 103%-ით გაიზარდა.
თბილისის აეროპორტი
თბილისის შოთა რუსთაველის სახელობის საერთაშორისო აეროპორტზე, რომელიც ქალაქის ცენტრიდან 15 კმ-ში მდებარეობს, მგზავრთა საერთო გადაყვანების 79,1% მოდის.
აეროპორტში ოპერირებს 31 ავიაკომპანია, რომლებიც ახორციელებენ რეისებს 36 მიმართულებით. 2016 წელს აეროპორტს დაემატა 5 ახალი ავიაკომპანია – Qeshm Air, Ata, El Al, Taban Airline და Zagros Airlines, და ოთხი ახალი მიმართულება — პეკინი, ბაჰრეინი, ისპაჰანი და დამამი.
მიმდინარე წლის ნოემბერში კიდევ სამი კომპანია დაიწყებს ოპერირებას — Turkmenistan Airlсines, Pobeda და Dart, რომლებიც იფრენენ აშხაბადში, როსტოვსა და კიევში.
ბათუმის აეროპორტი
ბათუმის საერთაშორისო აეროპორტით, რომელიც ქალაქიდან 2 კილომეტრში მდებარეობს, ისარგებლა გადაყვანილ მგზავრთა 12,4%-მა. გარდა შიდა და საერთაშორისო რეისებისა, აეროპორტი ასევე ემსახურება თურქეთის ჩრდილო-აღმოსავლეთ რეგიონებს.
აეროპორტში ოპერირებს თურქეთის 16 ავიაკომპანია, რომლებიც ახორციელებენ რეისებს 15 მიმართულებით. 2016 წელს აეროპორტს კიდევ დაემატა 6 ავიაკომპანია — EL AL, Scat Airlines, Airarabia, Ata, Taban Airline, Bravo Airways და ოთხი მიმართულება — აქტაუ, შარჟა, სანქტ-პეტერბურგი და თეირანი.
მიმდინარე წლის ნოემბერში ოპერირებას დაიწყებს კიდევ სამი კომპანია — Turkmenistan Airlines, Pobeda დ Dart, რომლებიც იფრენენ აშხაბადში, როსტოვსა და კიევში.
ქუთაისის აეროპორტი
ქუთაისის საერთაშორისო აეროპორტით, რომელიც ქალაქიდან დასავლეთით, 14 კმ-ში მდებარეობს, მგზავრთა საერთო რაოდენობის 8,4% იქნა გადაყვანილი. აეროპორტის პრიორიტეტია დაბალტარიფიანი ავიაკომპანიების მოზიდვა ქართულ ბაზარზე და კონკურენტუნარიანი გარემოს შექმნა როგორც ავიაკომპანიებს, ისე აეროპორტებს შორის.
აეროპორტში 4 ავიაკომპანია ოპერირებს, რომლებიც რეისებს 15 მიმართულებით ახორციელებენ.
WizzAir-ის ავიაკომპანია, რომელიც ბაზირებულია აეროპორტში, ახორციელებს ავიარეისებს შვიდი მიმართულებით — ბერლინი, მიუნხენი, დორტმუნდი, მილანი, ლარნაკა და სოფია.
მესტიის აეროპორტი
თამარ მეფის სახელობის მესტიის აეროპორტი მხოლოდ ადგილობრივი ავიარეისების განხორციელებისთვის გამოიყენება.
საანგარიშო პერიოდში ამ აეროპორტით ისარგებლა მგზავრთა საერთო რაოდენობის 0,14%-მა.
ამ აეროპორტის გამოჩენამ გაამარტივა საქართველოს სხვა რეგიონებში მიმოსვლა. რეგულარული ავიარეისები ხორციელდება თბილისიდან და ქუთაისიდან, ძირითადად, კარგ ამინდში.
მგზავრთა გადაყვანას ახორციელებს ავიაკომპანია Pegasus Airlines.
პირველი 9 თვის მანძილზე გადაყვანილია 3 105 მგზავრი და მათგან 44% უცხოელია. სულ საანგარიშო პერიოდში განხორციელდა 129 რეისი.
