თბილისი, 22 ივლისი– Sputnik. თბილისის სამხატვრო აკადემიაში ინოვაციების ლაბორატორია — ფაბლაბი გაიხსნა.
ფაბლაბი — სამრეწველო ინოვაციების ლაბორატორიაა (fabrication laboratory), სადაც მაღალტექნოლოგიური სპეციალიზებული დანადგარებით, 3D-მოდელირების პროგრამული უზრუნველყოფით ახალგაზრდობას შეუძლია საკუთარი ხელით გააკეთოს ყველაფერი: ესკიზიდან დაწყებული მზა პროდუქციით დასრულებული.
„ეს საერთო სამუშაო სივრცეა, სადაც სხვადასხვა პროფესიის ადამიანებს შეუძლიათ ერთობლივი პროექტები განახორციელონ. დარწმუნებული ვარ, რომ შემოქმედებითობასა და ინოვაციაზე დაფუძნებული განათლება ეკონომიკის ზრდისა და განვითარების წინაპირობაა“, — განაცხადა საქართველოს კულტურისა და ძეგლთა დაცვის მინისტრმა მიხეილ გიორგაძემ.
გასული წლის ივლისიდან განათლების სამინისტრომ ინოვაციური ტექნოლოგიების სააგენტოსთან ერთად პროფსასწავლებლებში ინოვაციების ლაბორატორიების — ფაბლაბების შექმნა დაიწყო, რომელიც აღჭურვილი იქნება თანამედროვე და მაღალტექნოლოგიური დანადგარებით, თანამედროვე ციფრული და კომპიუტერული ტექნიკით.
ფაბლაბების შექმნის მიზანია საინჟინრო-კვლევითი სიახლეების მქონე მაღალკვალიფიციური კადრების მომზადება; მსოფლიო დონის ინდივიდუალური და ტრადიციული პროდუქტების წარმოების განვითარება; ახალი თაობის სამეცნიერო და საინჟინრო ცოდნის გავრცელების მხარდაჭერა და ასევე ინოვაციურ ეკონომიკაზე გადასვლის პროცესის დაჩქარება.
