თბილისი, 6 დეკემბერი — Sputnik. საქართველოსა და აშშ-ის თანამშრომლობა თავდაცვის სფეროში ახალ დონეზე გადადის, აღნიშნეს საქართველოს მთავრობის მეთაურმა გიორგი კვირიკაშვილმა და აშშ-ის თავდაცვის მინისტრის თანაშემწის მოადგილემ მაიკლ კარპენტერმა თბილისში გამართულ შეხვედრაზე.
გაფართოებულ ფორმატში ჩატარებულ შეხვედრაზე განიხილეს ქვეყნებს შორის სტრატეგიული თანამშრომლობის ძირითადი ასპექტები, საქართველოში მიმდინარე და დაგეგმილი რეფორმები, აღნიშნულია მთავრობის ვებ-გვერდზე განთავსებულ განცხადებაში.
მხარეებმა ასევე აღნიშნეს, რომ საქართველოსა და აშშ-ს შორის გაფორმებული მემორანდუმი თავდაცვისა და უსაფრთხოების სფეროში პარტნიორობის გაღრმავების შესახებ თანამშრომლობის ახალ შესაძლებლობებს ქმნის. დოკუმენტს 6 ივლისს ხელი მოაწერეს საქართველოს პრემიერმა და აშშ-ის სახელმწიფო მდივანმა ჯონ კერიმ.
შეხვედრისას განსაკუთრებით აღინიშნა საქართველოს წვლილი მსოფლიოში მშვიდობისა და უსაფრთხოების უზრუნველყოფის საქმეში, რისთვისაც კარპენტერმა პრემიერ-მინისტრს მადლობა გადაუხადა.
კვირიკაშვილმა, თავის მხრივ, ქვეყნის უსაფრთხოების გაძლიერებისა და თავდაცვისუნარიანობის ამაღლების მიმართულებით აშშ-ის მხარდაჭერისთვის მადლიერება გამოხატა.
საქართველომ და ამერიკის შეერთებულმა შტატებმა დიპლომატიური ურთიერთობები 1992 წლის 23 აპრილს დაამყარეს. ქვეყნები აქტიურად თანამშრომლობენ თავდაცვის, უსაფრთხოების, ეკონომიკის, განათლების სფეროებში.
